Aðalfundur Gagnaveitu Skagafjarðar fór fram í sal Safnahússins að Faxatorgi á Sauðárkróki, miðvikudaginn 23.júní.  Dagskrá var með hefðbundu sniði og allar afgreiðslur samþykktar samhljóða.  Fundarstjóri var Sigfús Ingi Sigfússon, verkefnastjóri atvinnumála og fundargerð ritaði Arnar Halldórsson.  Stjórn félagsins var endurkjörin, Einar Gíslason fyrir Skagafjarðarveitur, Gísli Árnason fyrir hönd Sveitarfélagsins Skagafjarðar og Snorri Styrkársson fyrir Kaupfélag Skagfirðinga.  Endurskoðandi félagsins, Kristján Jónasson, var einnig endurkjörinn.  Fundarmenn höfðu umboð fyrir um 93 % hlutafjár.

Íbúar rúmlega 70 heimila í norðanverðu Hlíðahverfi hafa fengið bréf í pósti þar sem kynnt er þjónusta Gagnaveitu Skagafjarðar yfir ljósleiðara.  Þjónustuveitendur munu á næstunni kynna efnisframboð sitt.

Gagnaveita Skagafjarðar tók þátt í sýningunni á Króknum nú um helgina.  Á básnum okkar mátti sjá uppsetningu búnaðar og framboð á þjónustu yfir ljósleiðarann.

Hátt í 40 manns komu á kynningarfund Gagnaveitu Skagafjarðar og hreppsnefndar Akrahrepps í Héðinsminni.  Oddviti hreppsnefndar, Agnar Gunnarsson, bauð fólk velkomið og kynnti dagskrá kvöldsins. 

Verkefnastjóri Gagnaveitunnar tók þá við með glærusýningu á tjaldi, kynnti helstu þætti ljósleiðaratækninnar og fór yfir grundvallarhugtök eins og "bandbreidd" og "megabita".  Þá lýsti hann uppbyggingu kerfisins í Akrahreppi og útskýrði hvaða búnað og innanhúslagnir þarf að setja upp til að geta nýtt sér þá þjónustu sem boðið er upp á yfir ljósleiðarann. 

Síðan voru þjónustuaðilar taldir upp og gerð grein fyrir þeirra framboði og að lokum var skipt yfir á flatskjá og fengu fundargestir að flakka um þær 70 sjónvarpsrásir sem bjóðast. Einnig var hægt að upplifa hraðann á internetinu í tölvu en margir hafa fram til þessa einungis haft aðgang að ISDN tengingum.

Fólk var almennt áhugasamt og flestir skráðu sig á lista hjá oddvitanum að fá tæknimann heim til að skoða aðstæður og meta kostnað við uppsetningu búnaðar.

Á fundi stjórnar Gagnaveitu Skagafjarðar fyrir áramót var ákveðið að sækja um leyfi fyrir skiltum í Túnahverfi.  Skiltin eru komin upp og eiga að minna íbúa hverfisins á að þeir hafa aðgang að bestu gagnatengingum sem völ er á hér á landi.

Kostir þess að tengjast ljósleiðara eru fjölmargir.  Helst er að nefna hraðvirkari internetþjónustu, sjónvarpsþjónustu með tugum rása, myndaleigu og símaþjónustu.  Með þessum möguleikum opnast nýjar víddir í fjarvinnslu, fjarnámi, rafrænni heilbrigðisþjónustu, rafrænni stjórnsýslu og þátttöku í gagnvirkum tölvuleikjum svo að fátt eitt sé nefnt.  Þeir sem vilja virkja sína tengingu hafa einfaldlega samband við söludeild Vodafone í síma 1414 eða Fjölnet í síma 455-7900.

Þessa dagana er verið að klára vinnu við ljósleiðaravæðingu Akrahrepps.  Viðtökuprófanir fara fram á næstu dögum og styttist óðum í að hægt sé að bjóða Blöndhlíðingum að tengjast.  Einnig er unnið við ídrátt í Hlíðahverfi og vonumst við til þess að geta boðið upp á þjónustu þar bráðlega.

Tengigjöld Gagnaveitu Skagafjarðar hækka nú um áramót vegna breytinga á virðisaukaskatti. 

Tengigjald fyrir ljósleiðarasamband verður kr. 2975.-

Tengigjald fyrir örbylgjusamband í dreifbýli verður kr. 4535.-

Íbúar í norður-Hlíðum eru margir hverjir búnir að fá heimsókn frá ljósleiðaragenginu og farnir að velta fyrir sér næstu skrefum. 

Fyrsta skref er að draga ljósleiðarann í húsin, svo þegar að ákveðin hluti hverfisins er klár er hægt að fara að tengja í brunnum og dreifistöð.

Þá er hægt að fara að selja aðgang að ljósleiðaranum og verður það auglýst sérstaklega.

Í dag og næstu daga verða mælingamenn á vegum Gagnaveitunnar á ferðinni í Hlíðahverfi.  Verið er að staðsetja ljósleiðaralagnirnar með GPS tæki fyrir lagnagrunn sveitarfélagsins.  Í langflestum tilfellum þurfa þeir að fara um bakgarða hjá fólki, en eins og siðuðum mönnum sæmir þá banka þeir uppá fyrst og láta vita af sér.

Við vonum að fólk kippi sér ekki upp við þetta og biðjumst afsökunar ef einhver verður fyrir ónæði.

Nóbelsverðlaunin í eðlisfræði skiptast í tvennt að þessu sinni.  Annarsvegar til Dr. Charles Kao en hann er frumkvöðull í ljósleiðaratækni og rannsóknir hans leiddu til þess að fundin var leið til að senda ljós um glerleiðara yfir100 km í einu en ekki bara 20 metra eins og menn voru að bögglast við í upphafi.

Hinsvegar til Willard S. Boyle og George E. Smith því uppgötvanir þeirra leiddu af sér CCD skynjarann, rafrænt auga sem grípur mynd og breytir í stafrænar upplýsingar en það er grundvöllur þess að hægt er að taka stafrænar myndir og ljósrita litmyndir, svo að eitthvað sé nefnt.

Undanfarnar vikur hafa þeir viðskiptavinir Gagnaveitunnar sem að eru áskrifendur að sjónvarpi yfir ljósleiðarann orðið varir við truflanir í útsendingunni. Nú eiga þær að vera fyrir bý,  því tæknimenn Vodafone hafa komist fyrir vandann.

Vegna ákveðins misskilnings hjá Þjónustuveri Vodafone vill Gagnaveita Skagafjarðar taka fram að bilunin lá ekki í tengingum eða ljósleiðaraneti okkar, heldur var um ræða bilun í sendingunni hingað norður.

Fyrir hönd Vodafone biðjumst við velvirðingar á þeim óþægindum sem þetta kann að hafa valdið viðskiptavinum okkar.